機械人起飛

iFLYTEK 科大訊飛訊飛翻譯機,即場將口語廣東話翻譯為英文,速度較Google更快

科學園搞AI+U人工智能展覽,竟然有唔少內地著名企業,包括內地入選首批四個國家新一代人工智慧開放創新平台嘅科大訊飛。

科大訊飛嘅語音識別相當犀利,尤其識別少數民族方言,包括廣東話及四川話,非常準確。科大訊飛亦可以保留一啲臨瀕消失嘅方言。

科大訊飛到科學園AI+U,顯示語音即時翻譯技術,講解員一邊講,英文譯文馬上彈出,相當神奇,又介紹即時翻譯神器iFLYTEK 科大訊飛訊飛翻譯機,即時從廣東話直譯英文;呢個翻譯機在香港吾太流行,可能因為香港人英文講得好,即時翻譯機市場一般,但科大訊飛廣東話辨識率極高,唔少人用嚟手機上取代打字,電話留言等,甚至有人用嚟寫稿,肯定唔會執筆忘字。

AI+U又有幫機場搞數碼孖生兄弟(Digital Twins)嘅Chain Technology,利用BIM技術打造數碼模擬空間,亦可用激光point cloud打造3D空間建造模擬空間,然後模擬各種場景。

另外有一家叫O-Matic Intelligent Robot,研發出完全毋須編程機械人,機械臂只要工人簡單畫線,機械人就照做,有利集團正利用O-Matic電動車在地盤試驗,據講O-Matic機械人亦實驗為玻璃大廈洗窗,並測試大廈窗戶有無漏水之類,建築業已有唔少應用,以後見到機械人幫手做建築,唔駛太驚奇。

O-Matic正研究開發抹窗的機械人,可以取代人手在吊船上工作。上述的機械人已經量產,可由地盤工人自行設定,毋須由程式員每次進行編程。

科學園力推機械人產業,又鄰近中文大學,中大在機械人設計相當先進,最近宣布中大「醫療機械人創新技術中心」亦將落戶科學園,其中曾參與開發醫療機械人da Vinci嘅中大歐國威教授,除咗研究手術機械人,亦有唔少古怪開發意念,包括一部尾巴機械人,據講比Boston Dynamics直立機械人Atlas更靈活,肢體毋須好似Atlas咁粗壯,但動作更靈活,跑步打跟斗都無難度,睇呢機械人飛入尋常百姓家,日子將會不遠矣。

中央推大灣區概念,近期各家公司紛紛唱好,今個星期微軟亦在深圳搞「大灣區。Microsoft創新科技峰會」,據講數碼港行政總裁任景信亦會係主講者之一,亦有幾家香港初創,其中Racefit利用IoT創造智能衣服,可探測運動員姿勢是否正確,糾正劍擊及單車等運動姿勢,以更好利用體力,曾經同香港體育學院合作,Racefit開始時用嚟訓練運算員,後來發展成智能衣服,未來可能用在物理治療等各方面,糾正不健康姿勢。

Leave a Reply

Your email address will not be published. Required fields are marked *