中大創業日

今年已經係中大第五屆創業日,歡迎公眾人士到訪校園,有多個講座及現場示範。

下星期尾,中大舉行一年一度「中大創業日」(5月10日及11日);除咗多家初創參加展覽,亦有唔少講座。舊年中大創業大賽冠軍VoiceAI,近期獲得Hong Kong X-Tech投資1000萬人民幣,並且獲得多個大破席,已搬入深圳研究院眾創中心,發展相當唔錯,據聞有機會加入數碼港。

此外,現場又有80個創業團隊展示項目,包括前海隨身寶科技R-Guard、視見醫療Imsight、以上提及嘅VoiceAI,最近進入科學園嘅BioMed。

舊年中大創業日,中大校長段崇智主講再生醫療,商湯科技行政總裁徐立講人工智能,今年由於中大有十個項目,剛在日內瓦國際發明展中獲獎;包括兩隊獲「評判嘉許特別金獎」隊伍:楊升浩和楊偉豪教授網絡編碼技術;任揚教授、趙偉仁教授和劉家駿的完全可彎曲內鏡手術機械人項目等,都會有講座向大家介紹。

上述網絡編碼技術,應用非常廣泛,可用作建立分佈式儲存,解決儲存遇到保安及擴充性問題。網絡編碼技術可結合多個雲商儲存,低成本儲存超大量數據。近年,生物科技及人工智能等行業,蒐集咗大量數據,以供分析及機器學習,網絡編碼擴充儲存,前景相當唔錯。

中大物理系朱明中教授,過去幾年率領跨院校團隊,加入歐洲核子研究中心(CERN)嘅ATLAS大型國際粒子對撞實驗組,參與尋找「上帝粒子」實驗。最近又獲研究資助局卓越學科領域計畫,撥款7800萬元作為期8年研究,擴展ATLAS工作,參與內地擬建電子對撞機前期研究工作。內地興建正負電子對撞機(CEPC),性能上比歐洲大型強子對撞機更勝一籌,可產生更多上帝粒子,有機會發現一整套新粒子,研究宇宙暗物質。粒子對撞實驗亦產生超大量數據,唔少商業儲存系統都難以應付,網絡編碼就可應付實驗產生大量數據。

另一場演講,則係曾在阿里巴巴JUMPSTARTER創業活動登場,開發HomeCourt嘅本地初創NEX Team,呢個APP相當巴閉,推出不久獲多位NBA球星投資逾3千萬港元,今次邀得兩位聯合創始人分享,香港及美國矽谷兩地嘅創業經驗。HomeCourt 亦特別在現場設示範,參加者可以實際應用,了解透過結合AR及A I技術改進自己的籃球球技。另外有一場中大教授關海山主講,有關「種菇種未來─Mushroom-X的初創之旅」,除咗分享關教授創業之旅,亦分享菇類各重不可思議嘅用途,相當具教育性。

中大創業日係由中大校友傳承基金主辦,眾多與創業創新有關的校內單位,並由主要校友組織聯手策劃。

Leave a Reply

Your email address will not be published. Required fields are marked *